公佈消息 - 親兄弟

剛過去的weekend很難過......

老豆身體已經差到連醫生也放棄了，轉介佢下個月去日間寧養中心覆診，那是一個專門給癌未病人走最後一程的診所, 提供紓緩性質的治療，好讓病人最後的一段路走得輕鬆舒服一點。

於是，我也立下心要跟親戚們坦白老爸的狀況。儘管老爸可能會責怪我小題大做。

掙扎好久才撥下叔的號碼，心裡已經複習了不下百遍的字句，說出口時每個字都彷彿有千斤重。

「醫生話，老豆唔係剩返好多日子喇，差唔多喇」

每個字都好重，好重。

通知埋姑媽，約左兩老星期六早上茶樓見面。

好想星期六唔好嚟。唔好嚟。唔好嚟。

飲左兩個鐘茶，阿叔自己講左個半鐘。

講咩呢？

• 話阿爸不負責任，而家身體咁差係自己攞嚟。
• 話阿爸太硬頸，想當年佢提議阿爸返大陸換腎，最多佢畀錢，佢話機會畀左阿爸，阿爸自己放棄就算數。
• 話阿媽唔識持家令到我地頭家咁亂。話佢而家個女朋友唔錯，而家佢要拍拖唔多得閒睇老豆。
• 話姑媽太寵d仔女，自己幾十歲應該錫自己多d，唔好再幫仔女儲惠康印花。
• 話佢成日約d仔女見面，話佢得閒所以問埋d仔女鐘意食咩佢買定。
• 話我阿妹做人新抱要多d關心奶奶，要學持家，要接受老公係大男人，呢個世界唔會有男女平等。
• 話我咁大年紀要搵返個伴，有仔要趁後生生。
• 話我唔好咩事都攬哂上身自己揹，要分d畀細佬妹負責，有問題我諗唔通可以搵佢，因為佢個衫袋大d (經驗多d)，我個衫袋細d (經驗少d)。

我呢個做後輩嘅，可以反駁就反駁，唔可以反駁嘅地方就向佢報以一個hea爆嘅微笑。不過當佢話我阿爸阿媽點唔好嘅時候，我應該塊面不由自住咁黑黑地。

幾十歲人，一世人兩兄弟，大佬冇咩日子喇，做細佬嘅到呢個時候都仲要把口唔收咁串串貢。